Семей аймағының өкіл имамы Алтыбай Мақсат Қуанышұлының ұйымдастыруымен «Алаш ордасының құрылуына 100 жыл» толуына байланысты қалалық мешіт имамдарымен жамағаттар арасында Шағын футболдан жарыс өтті.
Мешіт имамдары ақ сәлде, ақ шапандарын спорттық киімге ауыстырып, тұтас бір күнін футбол алаңында өткізді. Дін қызметкерлерінің көркем уағыздарын тыңдап, иман байлығын жиып жүрген жамағаттарымызды бұл жолы мешіттен емес, «Жастар» спорттық кешенінен кездестірдік. Қала, аудан, ауылдардан жиналаған қатысушыларымыз 11 командаға бөлініп, қызу ойын жүргізіп, асыл дініміз бен қатар спорттық ойындарды кеңінен дәріптеді.
Көш бастаған Семей қалалық «Тыныбай» мешітінің командасы футбол кубогына иелік етіп, 1-орынмен жеңіс тұғырынан көрінді. Семей қалалық «Бұйғылы» мешітінің командасы 2-орынға жайғасса, Мешіт жамағаттар командасы 3-орынға табан тіреді. Бұл көрсеткіштермен қатар «Үздік қақпашы», «Үздік шабуылшы», «Үздік қорғаушы» және «Ең көп гол соққан» деген номинациялармен қатысушыларға Семей аймағы бойынша өкіл имамы Алтыбай Мақсат Қуанышұлы марапаттады.
Осылайша кейінгіге үлгі-өнеге болған дүбірлі дода өз мәресіне жетіп, ойын мақсаты анықталды. Ал, өз командаларына жақтасқан жанкүйерлер тарапы тартысты ойынды тамашалап, әсерлі ойынның куәсі болды.
Қос мұнаралы орталық мешітінің баспасөз қызметі.
«Суреттерді толығырақ фотогалереядан көре аласыздар»
