Абай Құнанбайұлы мешіті жанындағы Студенттер үйінің шәкірттеріне “ҚАЗАҚСТАН БАРЫСЫ”, “ЕУРАЗИЯ БАРЫСЫ” турнирлерінің жеңімпазы, Қазақ күресінен екі дүркін әлем чемпионы, Абай облысының мақтанышы Тұрсынов Мұхит Шыңғысбекұлымен кездесу ұйымдастырылды.
Мұхит Шыңғыбекұлы мен Абай Құнанбайұлы мешітінің ұстазы Санжар Ержанұлының арасында сұхбат түрінде өткен кездесу барысында Қазақ барысы өзінің спорттық карьерасы, ең тартысты жекпе-жектері, спортта биік жетістікке жетуінің сырларынан бастап, өмірлік ұстанымдары, бала тәрбиесіндегі көзқарастары мен тәжірибесі, ата-анамен қарым-қатынас, чемпиондық жауапкершілік, өзінің сүйіп оқитын кітаптары, үлгі тұтар спортшылары, Қазақ халқының тарихы және т.б. бірқатар мәселелер туралы сөз қозғап, студенттер тарапынан қойылған көптеген сұрақтарға жауап берді.
Өмірлік жетістіктерінің артында тынбайтын еңбек, қажымас жігер, ата-ананың батасы және темірдей тәртіп тұрғанын айтқан Мұхит Шыңғысбекұлы студенттерге спортта ғана емес, білімде де озық болудың маңыздылығын, сонымен қатар, ұлттық мінездің де өте маңызды екендігін жеткізді. Ғибратты кездесуден жан-жақты рухани азық алған студенттер Мұхит балуанға алғыстарын білдіріп, естелік суретке түсті.
