РАМАЗАН-2020: ҚМДБ БЕКІТКЕН МӘЛІМЕТТІ ҒАНА ЖАРИЯЛАУДЫ СҰРАЙМЫЗ

Қазақстан мұсылмандары діни басқармасы еліміздегі іргелі зерттеу орталықтарының бірі болып табылатын В.Г.Фесенков атындағы «Ұлттық ғарыштық зерттеулер мен технологиялар орталығы» мекемесінің ғылыми мәліметіне сүйеніп, сондай-ақ көрші Өзбекстан және Қырғызстан мұсылмандары діни басқармаларымен кеңесіп, Рамазан айының басталатын күнін белгіледі. Ораза кестесі де шариғат пен ғылыми негізге сүйеніп жасалады.
1900 қаралым 15.04.2020 15.04.2020
Осы ретте Рамазанға қатысты ақпаратты (ораза кестесі, пітір садақа мөлшері, ораза айтының күні, т.б.) Қазақстан мұсылмандары діни басқармасының ресми сайты – www.muftyat.kz-тен алуға шақырамыз. Жақын уақытта биылғы жылдың ораза кестесі сайтқа шығады.

Асығыс таратылған ақпарат, тексерілмеген дерек қоғам арасында түсінбеушілік тудыруы мүмкін. Сондықтан Діни басқарманың ресми ақпаратына жүгінуді сұраймыз.

Осы орайда, бұқаралық ақпарат құралдары қызметкерлері мен әлеуметтік желіде жазба қалдыратын жеке тұлғалардан Рамазанға қатысты ҚМДБ бекітпеген мәліметтерді жарияламауды сұраймыз.

ҚМДБ Ақпарат және қоғаммен байланыс бөлімі